Leek And Cottage Cheese Meatballs-Qofte Me Presh Dhe Gjizë

Qofte Me Presh Dhe Gjizë është një antipastë shumë e shijshme. Ashtu si dhe byreku me presh dhe gjizë, i cili shijon shumë, po kështu edhe këto qofte përgatiten me pak përbërës dhe shumë shpejt.

Gjithashtu për një gatim sa më të shëndetshëm unë i poqa në furrë, por ju mund ti gatuani edhe në tigan në pak minuta.
Nëse doni ti gatuani në tigan, shtoni pak vaj dhe i pjekim ne temperaturë jo shumë të lartë sa të formojnë koren krokante nga të dyja anët.

Ju mund të provoni edhe qofte me spinaq dhe gjizë.

Përbërësit

• 2-3 preshë
• 3-4 lugë plot me gjizë
• 2 lugë djath i bardhë i thërrmuar
• 1 vezë
• Rigon
• Kripë, piper, vaj ulliri
• 2-3 lugë Miell semolina për qoftet plus tjetër për ti lyer nga jashtë

Përgatitja

1. Do i pastrojmë preshët mirë në ujë të rrjedhshëm dhe i presim imët.
2. Në një tigan shtojmë 2 lugë vaj ulliri. Shtojmë preshët dhe pak kripë dhe i gatuajmë me kapak mbuluar në temperaturë mesatare për 10-15 minuta sa të zbuten.
3. Preshët e gatuara i kalojmë në një kullesë për të eleminuar lëngjet që mund të kenë.
4. Në një tas, shtojmë preshët e kulluara, gjizën, vezën, djathin e thërrmuar, kripë dhe piper. Shtojmë edhe 2-3 lugë vaj ulliri, rigon, dhe miellin semolina dhe i përziejmë të gjitha.
5. Me ndihmën e një luge marrim nga sasia e brumit, i japim formë me duar dhe e kalojmë sërish në miell semolina. Mund të përdorni edhe bukë të thekur ose miell misri.
6. Do i transferojmë në një tavë të veshur me letër furre dhe i pjekim në furrë të parangrohur në 200 gradë për 25-30 minuta.
7. I heqim nga furra, i kalojmë në një pjatë servirjeje dhe i shërbejmë të ngrohta ose temperaturë ambienti me salcat apo sallatat që ju pëlqejnë.

Ju Bëftë Mirë!

Në Përmbyllje