Ground Beef Stuffed Zucchini Recipe-Kungulleshka Të Mbushura me Mish Të Grirë

Kungulleshkat e Mbushura me Mish Të Grirë Në Salcë alla Bologneze janë një recetë shumë e shijshme që vlen te provohet sa herë që gjejmë kungulleshka të fresktëta. Kjo pjatë vlen të përgatitet në stinën e verës dhe vjeshtës kur dhe kunkulleshkat i gjejmë me shumicë të freskëta dhe në madhësinë që na duhen për këtë recetë, por fatmirësisht ka ende në treg kunkulleshka, ndaj dhe unë po e sjell këtë recetë nëse doni ta përgatisni për një drekë në familje, pasi është një pjatë kryesore shumë e shijshme.

Për këtë recetë kungulleshkat duhet ti zgjedhim të vogla dhe të shkurtra në mënyrë që të heqim me lehtësi zemrën e tyre pa i prerë dhe prishur formën. Mbushja e kunkulleshkave realizohet me një përzierje mishi të grirë në formën e brumit të qofteve dhe gatimi kryhet në domate dhe salcë domatesh. Salca në fund të gatimit del shumë e shijshme dhe shoqërohet me bukë të thekur. Por nëse tepron ju fare mirë mund ta përdorni për të shoqëruar edhe pasta apo bollgur me këtë salcë. Receta nuk është e vështirë dhe gatuhet me zjarr të ngadaltë.

Përbërësit për 4 Përsona

8-10 kungulleshka të vogla
2-3 domate të pjekura mirë
250-300 ml salcë (pure) domate
50 ml verë e bardhë ose e kuqe
300 g mish viçi i grirë
100-150 g salçiçe e freskët (viçi ose derri)
50 g proshutë
1 vezë
1 qepë e vogël
2-3 thelpinj hudhër
borzilok
Kripë, piper, rigon, vaj ulliri

Përgatitja

Do të pastrojmë zemrat e kungulleshkave duke u kujdesur të mos e prishim formën e tyre duke i zbrazur plotësisht për të mundësuar mbushjen e tyre. Mbushjen e ruajmë për një tjetër recetë, por nëse dëshironi edhe mund ta përdorni tek mbushja e kësaj recete nëse doni të mos përdorni proshutën.
Në një tas të madh do të shtojmë të gjithë përbërësit për mbushjen që të formojmë brumin e qoftes. Kështu do të shtojmë mishin e grirë të viçit, shtojmë salçiçen, të cilën e zhveshim nga cipa që e mbështjell dhe e thërrmojmë me një pirun, do të shtojmë proshutën e grirë imët, vezën, qepën e grirë në rende, hudhrat e shtypura, kripë, piper, rigon dhe vaj ulliri.
I përziejmë mirë, dhe fillojmë mbushim kungulleshkat, tepricën e brumit do e përgatisim qofte të vogla.
Në një tigan më pak vaj ulliri, një thelp hudhër dhe gjethe borziloku, do të shtojmë domatet e pastruara nga lëkura dhe farat dhe të grira në një grirëse. Ku domatja është gatuar dhe bërë kremoze, do të shtojmë edhe salcën (pure) e domates dhe do i lëmë të gatuhen së bashku 3-4 minuta në temperaturë mesatare. Shtojmë edhe pak kripë.
Do të shtojmë verën dhe do e lëmë për rreth 1 minutë në temperaturë të lartë të avullojë pjesa alkolike.
Shtojmë kunkulleshkat e mbushura dhe qoftet e vogla në salcën e përgatitur, kripë, piper, dhe pak vaj ulliri,(nëse ka nevojë edhe pak ujë) dhe do i lëmë te ziejnë të mbuluara me kapak në temperaturë mesatare në të ulët për rreth një orë.
I shërbejmë të ngrohta, shoqëruar me bukë të thekur, ose nëse dëshironi mund të përgatisni edhe pasta dhe ta shoqëroni me salcën e përgatitur dhe qoftet.