Rabbit In The Oven-Lepur Me Perime Në Furrë

Lepur Me Perime Në Furrë është një pjatë e dytë shumë e shijshme për tu shijuar në një vakt kryesor në fundjavë, apo edhe festa.

Lepuri i gatuar në këtë mënyrë del i aromatizuar, i butë, i lëngshëm, dhe i pëlqyer nga të gjithë që konsumojnë mishin në familje.

Receta është e thjeshtë dhe gatuhet pjesërisht në tigan dhe përfundon në furrë.

Ju mund të provoni edhe Lepur me Kërpudha dhe Pure Patatesh apo  Lepur Çomlek.

Përgatitja

• 1 lepur i butë
• 2 qepë të thata
• 3 qepë të njoma
• 3 domate mesatare
• 1 degë selino
• 1 karrotë
• 1 kungull jeshil
• 1 spec jeshil ose i kuq
• Hudhra, gjethe dafine, gjethe sherebele, rozmarinë, rigon i thatë
• Kripë e piper i zi
• Vaj ulliri
• 1 gotë verë e bardhë

Përgatitja

1. Do të copëtojmë lepurin në copa të mëdha, e lajmë mirë dhe e lëmë të kullojë.
2. Përpara se të nisim gatimin, presim imët të gjithë perimet në kubikë dhe i kemi gati. Do ta grijmë domaten të pastruar nga lëkurat dhe e lëmë mënjanë.
3. Si fillim, do të vendosim në zjarr një tigan të madh dhe vaj ulliri. Do të shtojmë 1 degë rozmarinë, gjethe sherebele, dafine dhe e lëmë pak që vaji të marri aromën e erëzave.
4. Shtojmë copat e mishit dhe i rrotullojmë mirë nga të gjitha anët që të marrin ngjyrë dhe shije. E shijojmë mishin me kripë e piper të zi të bluar në moment.
5. Kur të shohim që mishi e ka marrë një lloj ngjyre, e shuajmë me verën e bardhë. Ngremë temperaturën e gatimit që të avullojë alkooli.
6. I heqim copat e mishit dhe i vendosim në një tavë qelqi.
7. E fusim tavën në furrë të ngrohur më parë në 200 gradë dhe e lëmë aty të vazhdojë  pjekjen.

Përgatitja e Salcës me Perime dhe Përfundimi i Gatimit

1. Në të njëjtin tigan ku kaurdisëm mishin, do të shtojmë qepën e grirë dhe e përziejmë. Shtojmë edhe pak vaj nqs do të duhet.
2. Vijojmë gatimin duke shtuar karrotën dhe selinonë e prerë në kubik. E përziejmë mirë, sa të zbuten.
3. Shtojmë edhe kungullin dhe specin dhe kur të shohim që  perimet janë zbutur do të shtojmë domaten.
4. E përziejmë  dhe shtojmë edhe kripë e piper.
5. Do ta mbulojmë me kapak dhe do ta lëmë të gatuhet për rreth 10 minuta duke e përzierë here pas here.
6. Kur të shohim që salca është gati  do të shtojmë 1 gotë ujë, i cili do të na ndihmojë në gatimin e mishit në furrë.
7. Do të shtojmë rigonin e thatë, thelpinjtë e hudhrës të prerë në copa dhe këtë salcë do ta shtojmë te tava me mish lepuri. Me kujdes që copat e mishit ti vendosim sipër dhe bukur.
8. E fusim tavën të mbuluar me letër alumini përsëri në furrë dhe vazhdojmë gatimin për 1 orë.
9. Mishi do të dali i butë dhe i lëngshëm, i shoqëruar me salcën e vet.
10. E servirim ashtu siç është me feta buke të thekur  ose sallatë të stinës, kus kus, ose si të dëshironi ju.

Ju bëftë mirë!