Palermo-Style Chicken Cutlets-Kotoleta Pule Në Furrë

Kotoleta Pule Në Furrë është një pjatë e dytë shumë e shijshme, e cila përgatitet lehtë dhe shpejtë për një drekë apo darkë në familje. Kjo është një recetë e kuzhinës italiane, e zonës së Palermos, e cila është gjithashtu shumë e shëndetshme pasi mund ta gatuajmë në furrë, apo grill.

Unë sot po sjell recetën në furrë, plot shije, aromë, dhe e lehtë në kalori. Gatimi i kotoletave në këtë rast bëhet pa vezë e miell, por duke i kaluar në bukë të thërrmuar të aromatizuar.
Ju mund të provoni edhe Kotoleta Pule me spinaq.

Përbërësit

• 1 gjoks pule i madh ose 4 fileto pule
• 100 g bukë e thërrmuar
• 30 g djath Pecorino i grirë, ose kaçkavall dele
• 1 tufë majdanoz
• Kripë, piper, vaj ulliri

Përgatitja

1. Si fillim do të pastrojmë gjoksin e pulës nga kocka dhe e presim ne feta të holla. Mund edhe të blini fileto të prera gati.
2. Fetat e pulës do i shpëlajmë, thajmë me letër kuzhine dhe i rrahim me rrahëse mishi.
3. Do i marinojmë mirë me vaj ulliri, kripë e piper dhe i lëmë mënjanë. Vaji i ullirit do bëjë që kotoletat të lyhen si duhet në bukën e thërrmuar.
4. Ndërkohë, në një tas do të shtojmë bukën e thërrmuar, djathin e grirë, majdanozin e grirë imët, kripë e piper dhe i përziejmë mirë.
5. Do të përgatisim një tavë me letër furre. Kalojmë kotoletat e marinuara mirë në vaj ulliri në përzierjen e përgatitur nga të dyja anët. Në këtë mënyrë do të krijohet korja krokante dhe plot aromë.
6. Do i transferojmë në tavën e përgatitur. Mund ti shtoni edhe një fije vaj ulliri dhe i mbulojmë më letër pjekje.
7. Do i pjekim fillimisht në furrë të parangrohur 200 gradë për 8-10 minuta. Në këtë mënyrë mishi do ngelet i butë nga brenda.
8. Më pas do aktivizojmë programin grill për ti pjekur nga të dyja anët 4-5 minuta sa të krijojnë ngjyrën e bukur dhe të bëhen krokante nga jashtë.
9. Kotoletat i shërbejmë të ngrohta, menjëherë, shoqëruar me sallatë të freskët.

Ju Bëftë Mirë!

Në Përmbyllje