Easy Pear Cake Recipe-Kek Me Dardhë Dhe Kakao

Kjo recetë e Kekut me Dardhë dhe Kakao është e lehtë, me pak përbërës që na gjenden përherë në shtëpi dhe mbi të gjitha shumë e shijshme. Jemi në stinën e verës dhe dardhët mund ti gjejmë të freskëta dhe të pjekura mirë, plot aromë dhe shije. Për të gjithë adhuruesit e çokollatës, ju siguroj se kjo recetë është po aq e shijshme sa keku me dardhë dhe çokollatë dhe më e lehtë përsa i përket vlerave kalorike. Gatimi me fruta të freskëta e bën edhe më të shëndetshëm.

Përbërësit për një tavë keku me diametër 24 cm

• 260 g miell 00
• 180 g sheqer
• 3 vezë
• 95 ml vaj misri
• 120 ml qumësht
• 40 g Kakao e hidhur
• 1 pako fryrës ëmbëlsirash
• 400 g dardhë
• Pak kripë
• 1 limon

Përbërësit për një tavë keku me diametër 18-20 cm

• 175 g miell
• 2 vezë
• 120 g sheqer
• 65 ml vaj
• 80 ml qumësht
• 25 g Kakao e hidhur
• 12 g fryrës ëmbëlsirash
• 270 g dardhë
• 1 limon

Përgatitja

Për këtë ëmbëlsirë dardhët duhet të jenë të pjekura, ne do i përdorim në brendësi të kekut, por ju në varësi të tavës që do të përdorni mund të zgjidhni të lini një pjesë edhe për ti vendosur në sipërfaqe përpara pjekjes.

1. Ndezim furrën të ngrohet në 180 gradë.
2. Dardhët pastrohen nga lëkurat, pjesa e farave dhe priten në kubikë. Nëse doni ti vendosni në sipërfaqe, do ti presim në feta të holla. Do i marinojmë me lëngun e limonit që të mos oksidohen. Nëse doni të evitoni marinimin, do i përgatisni dardhët të fundit në proçes për ti shtuar direkt te brumi i kekut.
3. Në një tas të thellë qelqi, hedhim vezët dhe sheqerin dhe i rrahim me rrahës vezësh me korent për disa minuta derisa sheqeri të tretet.
4. Shtojmë vajin nga pak duke vazhduar përzierjen derisa të krijohet një masë homogjene. Shtojmë lëkurën e limonit të grirë me rende, përpara se ta shtrydhim, dhe më pas miellin e situr. Nëse nuk ju pëlqen limoni, mund të përdorni edhe vanilje me këtë recetë.
5. Kur mielli të jetë përzierë plotësisht, do të shtojmë qumështin. Vazhdojmë përzierjen dhe do të krijohet një brumë i butë dhe jo shumë i trashë, do të shtojmë kakaon e situr, fryrësin e ëmbëlsirave dhe në fund dardhët. 
6. Lyejmë tavën me pak gjalp ose vaj, e pudrosim me miell dhe hedhim brumin e përgatitur. Nëse dëshironi një pjesë të dardhëve ti vendosni në sipërfaqe, ky është momenti.
7. Vendosim kekun të piqet për 40-45 minuta në furrën e ngrohur më parë, në 180 gradë.
8. Përpara se ta heqim nga furra, bëjmë provën  me kunj dhëmbësh.
   1. E lëmë pak të ftohet, e heqim nga tava dhe e pudrosim me sheqer pluhur nëse ju pëlqen.

Ju bëftë mirë!

Faleminderit për mbështetjen tuaj duke komentuar apo ndarë recetën.