Byrek Me Qepe Te Njoma-Byrek Me Qepë Të Njoma Dhe Gjizë

Byreku është një traditë në kuzhinën shqiptare dhe panvarësisht se mënyra e gatimit dhe hapjes së petëve është e ngjashme, janë recetat e ndryshme që përdorim për mbushjen e burekut, që e bëjnë këtë gatim të ndryshëm dhe të pëlqyer nga të gjithë në çdo stinë. Sot do të sjellim Byrekun Me Qepë Të Njoma, një recetë shumë e shijshme, me pak përbërës por e pëlqyer nga të gjithë. Nëse mund të jesh skeptik dhe s’e ke provuar ende këtë recetë, vijo lexo artikullin dhe përgatite në shtëpi të shikosh sa e shijshme që do të jetë. Gjyshja ime e përgatiste përherë byrekun me qepë të njoma dhe nuk linte rast që qëpët e njoma apo bishtat e qepëve ti shkonin kot.
Kjo është një recetë vegjetariane, e cila mund të shërbehet si pjatë kryesore shoqëruar me një supë të stinës, por gjithashtu është perfekte për piknik apo për tu marrë me vete në punë.

Përbërësit:

Për brumin

500 g miell
250 ujë
Pak kripë

Për mbushjen

5-6 qepë të njoma të plota
100 ml qumësh ose kos
250 g gjizë pa kripë
Majdanoz ose nenexhik
2 vezë
Vaj ulliri, kripë, piper.

Për hapjen e petëve

Niseshte
Vaj misri
Petës

Përgatitja:

Në një tas qelqi sitim miellin dhe zëmë brumin me përbërësit e mësipërm duke e punuar mirë. Duhet të jetë i butë dhe të mos ngjtet nëpër duar. E mbulojmë me letër trasparente ose me pecetë dhe e lëmë të pushojë 30 minuta. Kjo do të na ndihmoje të hapim petët më mirë.
Vazhdojmë me mbushjen.
Në 1 tigan të thellë, hedhim vaj ulliri dhe shtojmë qepët e grira me gjith gjethet e tyre. I kavërdisim mirë, shtojmë pak kripë e piper dhe i përziejmë derisa të zbuten. Mund ti shtojmë dhe pak ujë ose qumësht që të gatuhet më mirë. Do i lëmë qepët e gatuara të ftohet në një tas qelqi dhe shtojmë përbërësit e tjerë gjizën që duhet te jetë pa kripë dhe e ëmbël, vezën, kosin ose qumështin. Sipas dëshirës. N q s i hedhim qumësht mbushja do të ketë një shije të ëmbël. Me kos do të jetë pak më majhoshe. Shtojmë dhe erëzat dhe mbushja është gati.
Vazhdojmë punën me petët.
E ndajmë brumin në 3 pjesë pastaj cdo njërën në 3 të tjera. Pjesët e brumit i hapim në rrathë me diametër 15 -20 cm sic tregohet në figurë dhe i lëmë mënjanë.I mbarojmë të gjitha dhe i bashkojmë në 3-she, duke shtuar pak vaj ndërmjet njëra- tjetrës. Fillojmë ti hapim në petë më të mëdha me ndihmën e niseshtes dhe petësit ose rrul picash. I hapim dhe i shtrojmë në tavë të lyer me vaj shtrojmë 2 petë poshtë, shtojmë mbushjen dhe 1 petë sipër. Rregullojmë anët e lyejmë me vaj dhe e pjekim në furrë të grohur më parë 200 gradë 30 minuta byreku duhet të jetë skuqur nga sipër dhe poshtë. E heqim dhe e mbulojmë me letër alumini ose një pecetë kuzhine. Ky veprim do të bëjë që byreku të zbutet nëse është tharë pak gjatë pjekjes. Pasi ftohet, e presim dhe e shërbejmë të ngrohtë.