Easy Blackberry Cake Recipe-Kek Me Manaferra

Ky Kek me Manaferra është një ëmbëlsirë shumë e shijshme e stinës së verës, kur dhe manaferrat mund ti gjejmë të freskëta. Është një kek i lehtë, pa gjalp, që mund ta konsumojmë për mëngjes, shoqërues shumë i mirë për kafen ose çajin, ose shumë i përshtatshëm edhe si ëmbëlsirë pas një vakti dreke apo darke.

Për të përgatitur një kek në shtëpi nuk është fare e vështirë. Ne përdorim gjithmonë ëmbëlsira të gatuara në shtëpi për mëngjeset dhe pasditet tona , si dhe për festa dhe dreka familiare. Të përdoresh fruta në to i bën ëmbëlsirat më të shëndetshme, më të bukura për syrin dhe shumë të shijshme. Sipas stinës le të shijojmë edhe frutat duke i gatuar në receta të ndryshme. Le të shijojmë edhe manaferrat në këtë recetë , e cila është shumë e thjeshtë për tu përgatitur.

Përbërësit

2 vezë
150 g sheqer
100 ml vaj misri
250 g miell
250 ml kos natyral
1 pako fryrës ëmbëlsirash
Lëkurë limoni e grirë
250 g manaferra
Sheqer pluhur 1 lugë gjelle

Pergatitja

Përgatisim gjithë përbërësit në tavolinën e punës, sipas masave respektive dhe fillojmë me përgatitjen.
Nxehim furrën në 180 gradë.
Në një tas të thellë qelqi, me ndihmën e një rrahësi elektrik, rrahim vezët me sheqerin sa të bëhet shkumë dhe dyfishohet volumi.
Shtojmë vajin duke e hedhur pak nga pak dhe duke e përzierë në të njëjtën kohë.
Shtojmë kosin dhe lëkurën e limonit të grirë në renden dhe vazhdojmë të përziejmë.
Pasi të jenë përzierë mirë shtojmë miellin e situr dhe fryrësin.
E përziejmë mirë gjithë masën, që mos të ngelen kokrra mielli të patretura dhe në fund shtojmë manaferrat e lara dhe të kulluara nga uji dhe përziejmë me kujdes. Do të ruajmë një pjesë të manaferrave për ti vendosur sipër tortës.
Marrim një tavë keku me diametër 24 cm, e lyejmë me pak gjalp ose vaj dhe e pudrosim me miell.
E hedhim brumin e përgatitur në tavën e kekut, e nivelojmë me ndihmën e një spatule ose piruni. I vendosim sipër manaferrrat e lëna mënjanë dhe e pjekim kekun në furrë të nxehur 180 gradë për 40-45 minuta. Kjo varet nga furra juaj. Bëni provën me kunj dhëmbësh.
Pasi ta nxjerrim nga furra e lëmë të ftohet pak dhe e heqim nga tava. E spërkasim me sheqer pluhur kur të ftohet. Mund ta shërbeni për një dreke familiare ashtu si është ose dhe shoqëruar me akullore me vanilje.